Laugarren mailako ikasleek intsektu-hotelaren proiektua aurkeztu digute:
“Zientziaren esparruan erleentzako hotel bat egin dugu, erleak eta beste intsektu batzuk zaintzeko eta babesteko helburuarekin. Proiektu honen bidez, naturaren zaintzaren garrantziaz jabetu gara, batez ere polinizatzaileek ekosistemetan duten paperaz. Hotela egiteko hainbat material erabili ditugu, besteak beste, banbua, egurra, hostoak, torlojuak eta soka.”
“Lehenengo pausuan diseinua pentsatu eta marraztu dugu, ondoren krokisa eginez ideiak hobeto antolatzeko. Behin hori eginda, eraikuntza-prozesuari ekin diogu, materialak moztu, lotu eta egitura osatuz. Taldean lan egitea oso lagungarria izan da, bakoitzak bere ekarpena egin duelako eta elkarri lagundu diogulako.”
“Oso proiektu interesgarria eta polita iruditzen zaigu, erleei eta beste intsektu batzuei laguntzen dielako. Gainera, polinizazio-prozesuak hobetzen laguntzen du, eta horri esker landareak eta loreak egoki ugaltzen dira. Azken batean, gure ingurunea zaintzeko modu praktiko eta erabilgarria dela uste dugu.”